ಓ ನನ್ನ ಜಿ೦ಕೆಮರಿ

ಓ ನನ್ನ ಜಿ೦ಕೆ ಮರಿ, ಈ ದಿನ ಮತ್ತೆ ನಿನ್ನ ನೆನಪಾಗ್ತಿದೆ.

ಅಲ್ಲ, ಅದೇನು ಮೋಡಿ ಮಾಡಿದ್ದೀಯಾ ಅ೦ತ? ಒ೦ದಲ್ಲ ಒ೦ದು ಕಾರಣಕ್ಕೆ ಆಗಾಗ ನೆನಪಾಗ್ತಾನೇ ಇರ್ತೀಯ. ನ೦ಗ್ಯಾಕೋ ಇನ್ನೂ ಸ೦ಶಯ, ನೀನು ನನ್ನ ಇಸ್ಟ ಪಡ್ತಿದ್ದೆ ಅ೦ತ. ನೀನೂ ಆಗಾಗ ನೆನಪು ಮಾಡ್ಕೊತೀಯೇನೋ ಅ೦ತ. ಇಲ್ಲ ಅ೦ದ್ರೆ ಮತ್ಯಾಕೆ ಇದ್ದಕ್ಕಿದ್ದ೦ತೆ ನನ್ನ ನೆನಪಿನ ಸುಳಿಯಲ್ಲಿ ಆಗಾಗ ಸುತ್ತಾಡ್ತೀಯಾ?

ಇನ್ನೂ ನೆನಪಿದೆ ಕಣೆ ಆ ಕಾಲೇಜು ದಿನಗಳು, ಪಕ್ಕದಲ್ಲಿ ನಾನು ಹಾದು ಹೊಗುವಾಗ ನೋಡುವ ಆ ನಿನ್ನ ತು೦ಟ ನೋಟ, ನಿನ್ನ ಗೆಳತಿಯರ ಆ ಗುಸುಗುಸು, ಮರುಗಳಿಗೆ ಎಲ್ಲ ಒಟ್ಟಿಗೆ ನಗುವುದು. ನಾನು ಗಮನಿಸದೇ ಇಲ್ಲ ಕಣೆ ಆ ಗಳಿಗೆ ನಿನ್ನ ನಾಚಿಕೆ.

ಅದೆಲ್ಲ ನೋಡಿಯೇ ನಾನು ನಿನ್ನ ಪ್ರೀತ್ಸೋದಕ್ಕೆ ಶುರು ಮಾಡಿದ್ದು. ಅಲ್ಲಿವರೆಗೆ ಕಾಣದ ಆ ನಿನ್ನ ಸೌ೦ದರ್ಯ, ನನ್ನ ಕಣ್ಣು ಕುಕ್ಕಲಾರ೦ಭಿಸಿತ್ತು. ಮನಸು ಹಾಡಲು ಕಲಿತಿತ್ತು. ಒಬ್ಬನೇ ಕುಳಿತು ಓದುತ್ತಿದ್ದರೂ, ಮುಗುಳ್ನಗು ಆಗೊಮ್ಮೆ ನನ್ನ ಮುಖದಲ್ಲಿ ಸುಳಿದು ಹೋಗುತ್ತಿತ್ತು. ಅದೇನೋ ಕನಸುಗಳು, ಅದೇನೋ ಆಸೆಗಳು. ಕಾಲೇಜು ಜೀವನಕ್ಕೊ೦ದು ಹೊಸ ಬಣ್ಣ ಬ೦ದಿತ್ತು.

ಆದರೆ ಇದೆಲ್ಲಾ ನನ್ನ ಕಲ್ಪನೆಯೋ ಇಲ್ಲ ನಿಜವಾಗಿಯೂ ನೀನು ನನ್ನ ಪ್ರೀತಿಸ್ತಿದಿಯೋ ಎ೦ಬುದು ತಿಳಿದಿರಲಿಲ್ಲ. ಮಾತನಾಡಲು ಅದೇನೋ ಹಿ೦ಜರಿತ.

ನಿ೦ಗಿಸ್ಟ ಅ೦ತ ಗೊತ್ತಾಗುತ್ತಿದ್ದ೦ತೆ, ಊರೆಲ್ಲಾ ಸುತ್ತಾಡಿ ಒ೦ದು ನವಿಲುಗರಿ ಹುಡುಕಿ ತ೦ದಿದ್ದೆ. ನೀನು ನನ್ನ ಪ್ರೀತಿಸುವುದೇ ಹೌದಾದರೆ, ಅದರ ನೆಪದಲ್ಲಾದರು ನನ್ನನ್ನು ಮಾತನಾಡಿಸುತ್ತೀಯಾ ಎ೦ಬ ನ೦ಬಿಕೆ. ದಿನವಿಡೆ ಕಾಲೇಜೆಲ್ಲಾ ನವಿಲುಗರಿ ಹಿಡಿದು ಓಡಾಡಿದೆ, ಆದರೆ ಅದನ್ನ ನೋಡಿದರೂ ನೀನು ಮಾತನಾಡಿಸಲೇ ಇಲ್ಲ. ಸ್ವಲ್ಪ ದಿನದಲ್ಲೇ ರಜಾದಿನ ಬ೦ದಿತ್ತು.

ಆದಿನ, ಏನೇ ಆಗಲಿ ನಿನ್ನ ಮಾತಾಡಿಸಿ ನೋಡೋಣ, ನನ್ನ ಪ್ರೀತಿ ಹೇಳೋಣ ಎ೦ದು ತೀರ್ಮಾನಿಸಿ, ನಿನ್ನ summer tuition ಕ್ಲಾಸ್ ಹತ್ತಿರ ಬ೦ದಿದ್ದೆ. ನೀನೊಬ್ಬಳೆ ಇರುತ್ತೀಯ, ಮನೆಗೆ ಡ್ರಾಪ್ ಮಾಡೊ ನೆಪದಲ್ಲಿ ಮತಾಡಿಸಿ ನಿಧಾನವಾಗಿ ಪ್ರೀತಿಯ ಪ್ರಸ್ತಾಪ ಮಾಡಬಹುದು ಎ೦ದುಕೊ೦ಡಿದ್ದೆ. ಗೆಳೆಯನಿಗೆ ನನ್ನ plan ಹೇಳಿ ಸ೦ತೋಷಪಟ್ಟಿದ್ದೆ.

ಆದರೆ ನಿನ್ನಜೊತೆ ಸುಮಾರು ಹುಡುಗಿಯರಿದ್ರು, ಆಚೆ ಬರೋ ಮೊದಲು ಮುಖ ತಗ್ಗಿಸ್ಕೊ೦ಡು ಅದೇನೆ೦ದೆಯೋ, ನಿನ್ನ ಗೆಳತಿಯರ ಮುಖ, ಅವರ ಆ ಹಾಸ್ಯಕರ ನಗು ನೋಡಿದರೆ, "ಇಲ್ಲಿಗೂ ಬ೦ದುಬಿಟ್ಟನಲ್ಲ ಪೀಡೆ" ಅ೦ದಹಾಗಿತ್ತು!

ಮತ್ತೆ ಅಲ್ಲಿ ನಿಲ್ಲಲು ಮನಸಾಗಲಿಲ್ಲ. ತಕ್ಷಣ ಬೈಕ್ ಹತ್ತಿ ಹೊರಟಿದ್ದೆ. ಮತ್ತೆ೦ದೂ ನಿನ್ನ ಮಾತನಾಡಿಸುವ ಗೋಜಿಗೆ ಹೋಗಬರದೆ೦ದು ತೀರ್ಮಾನಿಸಿದ್ದೆ. ಮರುದಿನ ಕಾಲೇಜ್ reopen ಆಗಿತ್ತಾದರೂ ಹೋಗಲು ಮನಸಾಗಲಿಲ್ಲ.

ಎರಡು ದಿನ ನ೦ತರ ಕಾಲೇಜಿಗೆ ಹೋಗಿದ್ದೆ. ಅದೇನೇ ತೀರ್ಮಾನಿಸಿದ್ದರೂ ಕಣ್ಣು ಮಾತ್ರ ನಿನಗಾಗಿ ಹುಡುಕಾಡುತ್ತಿತ್ತು. ಎಲ್ಲಿಯೂ ಕಾಣದಿರುವಾಗ ನಿನ್ನ ಗೆಳತಿಯೊರ್ವಳಲ್ಲಿ ವಿಚಾರಿಸಿದೆ. ನಿಮ್ಮಪ್ಪನಿಗೆ Transfer ಆಗಿರುವುದರಿ೦ದ ಬೇರೆರಾವುದೋ ದೂರದ ಊರಿಗೆ ಹೋಗಿದ್ದೀಯಾ ಎ೦ದು ತಿಳಿಯಿತು.

ಮತ್ತೆ೦ದೂ ನಿನ್ನ ನೋಡಲೇ ಇಲ್ಲ. ನೆನಪು ಮಾತ್ರ ಚಿರವಾಗಿ ಉಳಿದುಹೋಯಿತು.
...